15 лютага 2024 года ў рамках гарадскога рэсурснага цэнтра па выхаваўчай рабоце “Фарміраванне нацыянальнай самасвядомасці асобы сродкамі традыцыйнага народнага мастацтва беларусаў” у цэнтры Ветразь адбылося свята Стрэчанне, паводле традыцыі в.Пласток Любанскага раёна. Дадзенае мерапрыемства – дыпломны праект студэнткі 4 курса 403 групы Замарока Ксеніі пад кіраўніцтвам Э.В.Шчадрыной Беларускага дзяржаўнага ўніверсітэта культуры і мастацтваў.
Стрэчанне (Грамніцы, Сраценне, Устрэчанне) – дзень сустрэчы зімы з летам, свята свечкі і “жывога агню”.
У гэты дзень нашы продкі назіралі за надвор’ем, каб даведацца, якая прыйдзе вясна: калі на Грамніцы нап’ецца певень вадзіцы, то на Юр’я наесца вол травіцы; калі снег перамятае цераз дарогу, то чакаецца позняя вясна і інш.
Таксама было шмат прыказак на свята: “Грамніцы – палова зіміцы”, “Да Грамніц не скідай з рук рукавіц, а як прайшлі Грамніцы, то ўжо не патрэбны рукавіцы”.
У мерапрыемстве ўзялі ўдзел фальклорныя калектывы цэнтра дадатковай адукацыі дзяцей і моладзі “Ветразь” г.Мінска, а менавіта “Мілавіца” (кіраўнік – Касцяневіч Н.У.) і “Скарбніца традыцый” (кіраўнік – Хамутова І.В.). А таксама студэнцкія калектывы кафедры народна-песеннай творчасці і фальклору БДУКіМ “Страла” (кіраўнік – Шчадрына Э.В.), “Талака” (кіраўнік – Пладунова Т.А.).
Падчас мерапрыемства ўдзельнікі свята праспявалі на вуліцы веснавыя песні “Зіма з летам страчаецца”, “А ў нас сёння Стрэчанне”, “Скакаў верабейка дый па вуліцы”, затым хлопец з грамнічнай свечкай выйшаў у цэнтр, як сімвал свята. Кульмінацыйным дзеяннем свята было закідванне бліноў на дрэва, якія сімвалізуюць сонейка, надыход цёплых дзянёчкаў.
Пасля абрадавай часткі ўсе ўдзельнікі накіраваліся ў памяшканне для удзелу ў гульнёва-танцавальнай праграме.